Nadakpan sa Cebu City Police Office (CCPO) ang tulo ka suspek sa carnapping ug nabawi ang gikawat nga Toyota Hilux sulod sa 24 oras human sa insidente.
Gikawat ang Hilux gikan sa parking area sa usa ka condominium sa V. Rama Avenue, Barangay Guadalupe. Paspas nga misugod sa imbestigasyon ang Police Station 9 ug joint team sa CCPO gamit ang CCTV backtracking ug intelligence-driven investigation.
Ang unang suspek nadakpan sa Barangay Kamputhaw ug mitultol sa mga pulis sa lugar diin gitago ang Hilux, nga nabawi sa parking area sa usa ka simbahan. Ang ikaduhang suspek nasikop human sa mubo nga paggukod sa General Arcadio Maxilom Avenue, diin narekober ang yawe sa Hilux ug usa ka Toyota Rush nga giingong gigamit sa krimen.
Ang ikatulong suspek nadakpan sa usa ka guest house sa M. Yap Street, Capitol Site, diin narekober ang gituohang drug paraphernalia ug sling bag. Personal nga gitugyan ni Acting City Director PCOL Ricky C. Sumalde ang nabawing Hilux ngadto sa tag-iya ug gihingusgan ang kahinungdanon sa paspas nga aksyon ug koordinasyon sa mga police unit.
Photo Courtesy: PNP Cebu City Police Office
