Gipangulohan ni Cebu City Mayor Nestor Archival ang turnover ceremony sa gipalambo nga Barangay Health Center ug Nutrition Office sa Barangay Sambag 2 niadtong nakalabay nga adlaw.
Gidayeg ni Archival ang inisyatiba sa barangay ug ang pakigtambayayong niini sa Ramon Aboitiz Foundation, Inc. (RAFI) nga nakatabang sa pagpatuman sa proyekto.
Matud ni Barangay Captain Kieth Noel Wenceslao, tumong nga mahimong 24/7 health center ang pasilidad, nga adunay integrated birthing center ug Botica sa Barangay aron masiguro ang padayon ug dali ma-access nga serbisyo panglawas sa mga residente.
Matud pa ni Wenceslao, gikinahanglan ang dugang nga manpower gikan sa City Health Department aron matuman ang 24/7 nga operasyon. Gipamahayag ni Archival ang iyang hingpit nga suporta ug misaad nga motabang ang kagamhanan sa dakbayan sa panginahanglan sa barangay.
Ang proyekto usa ka Public-Private Partnership tali sa RAFI, SWU PHINMA, Barangay Sambag 2 ug Cebu City Government, nga nagtinguha sa pagpalig-on sa primary healthcare services sa barangay.
Photo Courtesy: Cebu City Public Information Office
