Arestado ang duha ka 25-anyos nga giingong mga ginikanan sa usa ka 5-anyos nga batang babaye atol sa operasyon batok sa online sexual abuse sa Barangay Tisa, Cebu City.
Sumala sa NBI-CEVRO, nadiskubrehan sa imbestigasyon ang giingong pagbaligya ug pag-apod-apod online sa ilegal nga mga materyales nga naglambigit sa mga menor de edad, lakip ang maong bata.
Gisugdan ang imbestigasyon niadtong Septiyembre 18 human makadawat og referral gikan sa HSI Manila. Niadtong Septiyembre 29, nag-isyu ang korte og cyber-warrant batok sa usa sa mga suspek, nga gipatuman pagkasunod adlaw.
Nadakpan ang duha sa joint operation sa NBI, HSI Manila, IACAT ug DSWD. Samtang ang mga suspek temporaryong gipabilin sa kustodiya sa NBI-CEVRO, ang bata gitugyan sa DSWD-7 alang sa proteksyon ug pag-atiman.
Matud sa NBI, giangkon sa amahan nga nakautang sila human mipalit og iPhone ang iyang asawa, hinungdan nga ilang gi-transact ang bata ngadto sa mga langyaw.
Giatubang sa mga suspek ang mga kaso ubos sa RA 11930, RA 9208 ug RA 7610.
Photo Courtesy: PNP Cebu City Police Office
