Mibalik na ang Last One Laughing Philippines alang sa ikaduhang season, diin napulo ka komedyante ang mag-atubangay sa usa ka hagit sa pagpakatawa sa uban, apan dili mahimong mokatawa mismo.
Mobalik isip host si Vice Ganda, samtang apil sa bag-ong season sila Ethel Booba, Long Mejia, Epy Quizon, Pooh, Candy Pangilinan, Esnyr, Donna Cariaga, Chariz Solomon, James Caraan, ug Charuth.
Sulod sa unom ka oras, magpuyo ang mga komedyante sa usa ka lugar ug maningkamot nga mapakatawa ang ilang mga kauban samtang magpabiling seryoso.
Sumala sa direktor nga si Randolph Longjas, usa sa iyang gipaabot mao ang interaction sa mga komedyante, ilabina tungod sa ilang nagkalain-laing estilo sa komedya ug kaliwatan.
Gilauman usab niya ang mga higayon diin maglisod ang mga contestant sa pagpugong sa ilang katawa. Sa unang season niadtong 2024, si Chad Kinis ang nakadaog ug nakakuha sa usa ka milyon ka pesos nga premyo.
Photo courtesy:Prime
