Giaprubahan sa Cebu Provincial School Board (CPSB), ubos sa pagpangulo ni Gov. Pamela Baricuatro, ang ₱51.6 milyon nga supplemental budget alang sa dugang nga mga programa ug proyekto sa Department of Education (DepEd) Cebu Province.
Lakip sa pondo ang pagpatukod og dugang temporary learning shelters (TLS) sa Cordova ug Danao City, ingon man ang pagpahigayon sa ikaduhang Provincial Sports and Cultural Meet karong tuiga.
Matud ni Provincial Treasurer Atty. Roy Salubre atol sa miting sa CPSB niadtong Oktubre 6, adunay ₱1.5 bilyon nga trust fund ang school board hangtod Hulyo 31.
Gibahin ang ₱20 milyon alang sa dugang TLS, samtang ₱100,000 alang sa operational requirements sa CPSB. Adunay usab ₱22 milyon nga tabang alang sa 44 ka lungsod nga moapil sa provincial meet sa Disyembre, o ₱500,000 matag munisipyo.
Dugang nga ₱9.5 milyon ang gigahin alang sa pagpahigayon sa maong kompetisyon, lakip ang uniporme ug pagkaon alang sa mga opisyal sa dula ug mga personnel sa DepEd.
Ang supplemental budget gikonsiderar tungod sa pag-adjust sa DepEd Cebu sa bag-ong school calendar, nga naghatag og dugang higayon alang sa co-curricular activities ug training apan nagdala usab og dugang panginahanglan sa pondo.
Photo Courtesy: Cebu Province
