Nadakpan ang usa ka security guard nga giila sa kapulisan isip Top 2 Provincial Level ug Top 2 Municipal Level nga wanted sa kasong murder, sa law enforcement operation sa Barangay Galas, Olutanga, Zamboanga Sibugay, alas-10 sa buntag niadtong nakalabay nga adlaw.
Gipangunahan sa personnel sa Olutanga Municipal Police Station, kauban ang Alicia MPS, ZSP MARPSTA ug Colt-3 sa 106th Infantry Battalion, 1st Infantry Division, Philippine Army, ang operasyon nga misangpot sa pagdakop sa suspek. Ang nadakpan usa ka minyo nga lalaki ug residente sa Barangay Galas, Olutanga.
Ang pagdakop gihimo pinaagi sa warrant of arrest nga gi-isyu batok kaniya alang sa kasong murder. Atol sa pagdakop, gipahibalo sa mga otoridad ang suspek sa hinungdan ug kinaiya sa iyang pagdakop, lakip ang iyang constitutional rights ubos sa Miranda Doctrine ug Anti-Torture warning, gamit ang pinulongan nga iyang hingpit nga nasabtan.
Gidala ang nadakpang suspek sa Olutanga Municipal Police Station alang sa hustong dokumentasyon ug kustodiya, samtang nagpadayon ang proseso alang sa iyang kaso.
