Nasamdan ang usa ka lalaki nga drayber sa motorsiklo human maaksidente sa National Highway sa Purok Sweetrose, Barangay Kitabog, Titay, Zamboanga Sibugay niaging adlaw.
Base sa inisyal nga imbestigasyon sa kapulisan, nag-atbang ang direksyon sa pagbiyahe sa usa ka Toyota Innova ug Honda XRM sa dihang kalit nga mibuto ang front-left tire sa Innova. Tungod niini, nawad-an og kontrol ang drayber sa sakyanan ug misulod sa pikas lane, hinungdan sa head-on collision sa motorsiklo.
Tungod sa kusog sa pagbangga, natumba ug nahulog sa sementadong dalan ang drayber sa motorsiklo ug nakaangkon og mga samad sa nagkalain-laing bahin sa lawas. Gidala dayon siya sa GTH Medical Hospital sa Tenan, Ipil alang sa medical treatment.
Wala masamdan ang drayber sa Toyota Innova, apan nakasinati og kadaot ang duha ka sakyanan. Ang Innova mibangga usab sa steel signage sa PENRO checkpoint. Ang duha ka sakyanan gidala sa Titay Municipal Police Station alang sa hustong disposisyon.
