Nasunog ang usa ka balay nga gipanag-iya sa pamilya Jilar sa Purok Makugihon, Barangay Tirso Babiera, Ipil, Zamboanga Sibugay bandang alas 11 sa buntag october 8, 2026. Sumala sa unang kasayuran, misugod ang sunog bandang alas onse sa buntag ug dali kining namatikdan sa mga residente sa maong lugar.
Usa sa mga silingan ang unang nakamatikod sa baga nga aso nga migawas gikan sa maong panimalay. Tungod niini, dali siyang nangita og paagi aron mapahibalo ang mga bombero ug mangayo og tabang sa pagtubag sa sunog.
Human mapahibalo ang mga bombero, misanong dayon ang mga fire responders sa maong lugar aron mapugngan ang pagkuyanap sa kalayo. Nakig-alayon usab ang ubang mga residente sa pagtabang samtang naghulat sa pag-abot sa mga bombero.
Naratol usab ang mga silingan, ilabina ang mga nagpuyo sa usa ka boarding house nga nahimutang duol sa nasunog nga balay, tungod sa kahadlok nga mokuyanap ang kalayo ngadto sa ubang kabalayan.
Dali usab nga nakahipos sa ilang mga gamit ang mga boarders ug mipahawa sa maong lugar human mahibalo nga nasunog ang balay nga duol sa ilang gipuy-an.
Pinaagi sa paspas nga pagresponde ug pagtinabangay sa mga bombero gikan sa nagkadaiyang lungsod, nakontrolar ang sunog bandang alas uno sa hapon ug napugngan ang pagkuyanap niini ngadto sa ubang kabalayan.
Apan wala pa ideklarang fire out ang maong sunog tungod kay nagpadayon pa ang clearing operation aron masiguro nga wala nay nahibiling baga nga mahimong hinungdan sa pagsiga pag-usab.
Padayon pa ang imbestigasyon sa Bureau of Fire Protection o BFP Zamboanga Sibugay aron mahibal-an ang hinungdan sa sunog ug matino ang kantidad sa mga nahimong kadaot. Sa pagkakaron, wala pa masayod ang tag-iya sa balay kung unsa ang hinungdan sa pagsugod sa kalayo.
