Gipahigayon sa Municipal Agriculture Office sa Matag-ob, ubos sa pagpangulo ni Municipal Agriculturist Claudia C. Ibañez, kauban ang Philippine Rice Research Institute kon PhilRice Bicol Branch Station, ang Variety Field Trial o VFT Field Evaluation ug Data Collection didto sa uma ni farmer-cooperator Orlando Viacrusis sa Barangay Imelda, Matag-ob, Leyte niadtong nakalabay nga adlaw.
Pinaagi sa maong kalihokan, gitugotan ang mga lokal nga mag-uuma nga personal nga maobserbahan ug masuta ang nagkadaiyang klase sa humay base sa ilang performance sa uma, hitsura, kalidad sa lugas ug uban pang maayong kinaiya. Gipangayo usab ang ilang obserbasyon ug preference aron makatabang sa pagpili sa mga barayti nga mas angay sa lokal nga kondisyon sa pagpanguma.
Base sa evaluation sa mga partisipanteng mag-uuma, nanguna isip Top 1 ang NSIC Rc 740, gisundan sa NSIC Rc 222 isip Top 2, NSIC Rc 738 sa Top 3, NSIC Rc 470 sa Top 4 ug NSIC Rc 732 sa Top 5. Gipakita sa maong kalihokan ang importante nga papel sa mga mag-uuma sa pagpili sa mga barayti sa humay nga adunay maayong potensyal alang sa mas produktibong pagpananom sa Matag-ob.
Photo courtesy: Municipal Government of Matag-ob
