Nasunog ang usa ka 10-wheeler truck nga gimaniho ni alyas “Gardo,” 38 anyos, ulitawo, ug residente sa Barangay Tagbubunga, Villaba, Leyte human kini kalit nga midilaab didto sa National Highway, Poblacion Zone II, Capoocan, Leyte, pasado alas 10:55 sa buntag niadtong, Oktubre 7, 2026.
Sumala sa inisyal nga impormasyon, nakaparada sa daplin sa karsada ang trak nga kargado og mga materyales para sa konstruksyon sa dihang kalit lang kini nga midilaab.
Tungod sa maong insidente, nadaot ang atubangan nga parte sa trak, lakip na ang Official Receipt/Certificate of Registration (OR/CR), lisensya sa drayber, ug uban pa niyang personal nga gamit. Gibanabana nga mukabat sa ₱90,000 ang danyos sa maong insidente.
Walay gikataho nga naangol sa maong sunog. Samtang, nagpadayon pa ang imbestigasyon sa Bureau of Fire Protection (BFP) aron matino ang tinuod nga hinungdan sa maong insidente.
Photo courtesy:Jomil Ursal
