Nagpadayon ang national validation sa Ormoc City alang sa 2026 Presidential Awards for Child-Friendly Municipalities and Cities o PACMC, isip kabahin sa proseso sa pagtimbang-timbang sa pagpatuman sa mga programa ug serbisyo alang sa mga kabataan.
Tumong sa maong validation ang pagsusi sa mga programa, proyekto ug pasilidad sa siyudad nga nagtutok sa proteksyon, kaayohan ug pagpanalipod sa katungod sa mga kabataan.
Sumala kang CSWD Head Maribel Gucela, upat na lamang ka mga siyudad gikan sa 41 ka mga lokalidad sa tibuok nasud ang nakaabot sa national validation, lakip na ang Ormoc City.
Atol sa validation, gisusi sa national assessment team ang nagkalain-laing programa ug pasilidad sa siyudad nga may kalabotan sa pagpalambo sa kaayohan, kaluwasan ug pagpanalipod sa mga kabataan.
Kabahin kini sa nasudnong pag-ila sa mga lokal nga pangagamhanan nga nagpakita og epektibo ug makanunayon nga pagpatuman sa mga programa ug serbisyo alang sa kaayohan ug katungod sa mga kabataan.
Photo Courtesy: Jupz Pascubillo
