Boluntaryong mitugyan sa iyang kaugalingon ngadto sa kapulisan sa Abuyog ang usa ka 45-anyos nga mag-uuma nga giila lamang sa alyas nga “Monmon,” minyo ug residente sa Barangay Libertad, Abuyog, Leyte niadtong Oktubre 6, 2026, isip kabahin sa padayong kampanya batok sa ilegal nga droga.
Ang naasoy nga indibidwal, personal nga mitungha sa Abuyog Municipal Police Station nga walay pagpugos, pagpanghadlok o pagpamugos sa bisan unsang paagi.
Ang maong kalihokan gipasiugdahan sa Leyte Police Provincial Office (LPPO), ubos sa pagpangulo ni Provincial Director PCOL Celerino M. Sacro Jr., pinaagi sa Abuyog Municipal Police Station nga gipangulohan ni Acting Chief of Police PMAJ Luis B. Hatton. Matod sa kapulisan, ang padayong pagpatuman sa kampanya batok sa ilegal nga droga sa maong lungsod usa sa mga hinungdan nga nakaimpluwensya sa desisyon sa indibidwal nga motugyan ug magbag-o sa iyang kinabuhi.
Human sa iyang boluntaryong pagtugyan, gipailalom siya sa gikinahanglang dokumentasyon ug pagproseso, lakip ang pagpirma sa usa ka Affidavit of Undertaking, isip pagpamatuod sa iyang tinguha nga magbag-o ug undangon ang pagkalambigit sa ilegal nga droga.
Photo courtesy: PNP LPPO
