Wala na kabalibad ang usa ka 31-anyos nga lalaki nga giila sa alyas “Sydon” human nga giaresto sa mga kapulisan tungod sa kasong trespass ug malicious mischief sa Foremost Village Phase 2, Barangay Apopong, General Santos City, alas-4 sa kaadlawon niadtong nakalabay nga adlaw.
Base sa inisyal nga imbestigasyon, nasakpan ang suspek sulod sa balay sa iyang uyoan pasado alas-3:30 sa kaadlawon, diin wala didto ang tag-iya tungod kay nagbakasyon kini niadtong higayona.
Sa pag-abot sa responding police, nakita nga tulo ka pultahan sa balay ang pinugos ug giablihan, samtang naguba usab ang pipila ka personal nga kabtangan sa tag-iya, lakip ang mga porselana ug imported nga mga bino.
Gibanabana sa kapulisan nga mokabat sa kapin 72 mil pesos ang kinatibuk-ang kantidad sa mga kadaot. Gipahibalo ang suspek sa hinungdan sa iyang pagdakop ug sa iyang mga katungod ubos sa Konstitusyon.
Samtang giandam na sa kapulisan ang tukmang mga kaso batok sa suspek alang sa inquest proceedings.
