Nagkahiusa ang Philippine Coast Guard o PCG Southern Mindanao ug ang Maritime Industry Authority o MARINA aron matabangan ang mga mangingisda ug mga tag-iya sa sakayan nga makakompleto sa gikinahanglang dokumentasyon alang sa legal ug luwas nga paglayag.
Matud ni Coast Guard District Southern Mindanao Commander Commodore Jonathan Marfil, daghan sa mga fishing vessel nga ilang nasuta ang adunay kulang o expired nga mga sertipiko ug dokumento nga gikinahanglan sa paglayag.
Bisan pa niini, gipasiugda ni Marfil nga dili tumong sa PCG ang pagdakop o pagsilot dayon sa mga mangingisda, kondili ang pagtabang kanila nga makatuman sa mga kinahanglanon sa balaod.
Tungod niini, nakigtambayayong ang PCG sa MARINA, nga maoy responsable sa pag-isyu ug pagdumala sa mga sertipiko ug uban pang dokumentasyon sa mga sakayan.
Pinaagi sa maong koordinasyon, gilauman nga mapadali ang proseso sa pagkompleto ug pag-renew sa mga dokumento aron makabalik sa legal ug luwas nga operasyon ang mga sakayan sa mga mangingisda.
Photo courtesy: CGDSM
