Nanawagan ang lokal nga pangagamhanan og mga otoridad sa Tulunan, sa mga residente nga magpabiling kalmado ug mag-amping sa pagpaambit og impormasyon human sa gikatahong pagpamusil sa Purok 13, Barangay Dungos. Gipahinumdoman ang publiko nga likayan ang pagpakaylap sa mga balita sa social media nga wala pa mapamatud-i, aron malikayan ang dugang kahadlok ug kalibog sa komunidad.
Isip kabahin sa pagtubag sa insidente, miadto sa lugar ang kapulisan ubos sa pagpangulo ni Chief of Police PMAJ Rolando L. Dillera Jr., uban ang mga kasundalohan, aron susihon ang kahimtang ug masiguro ang kaluwasan sa mga residente. Ingon man, nagpadayon usab ang imbestigasyon sa mga otoridad may kalabotan sa pagpamusil.
Gani, giawhag ang mga adunay impormasyon nga makatabang sa paglamdag sa kaso nga makig-alayon sa pinakaduol nga estasyon sa kapulisan o sa may katungdanang mga otoridad. Sa kasamtangan, padayon usab ang koordinasyon sa lokal nga pangagamhanan ug mga otoridad aron mapadayon ang kalinaw ug kahapsay sa lungsod.
Photo courtesy: Local Government of Tulunan
