Nadamyos ang pundasyon sa tulay sa Barangay Kibudtungan, Carmen, Cotabato, human aksidenteng mahulog gikan niini ang usa ka dakong trailer truck bandang alas-11 sa buntag niadtong Huwebes, Oktubre 8. Tungod sa insidente, nabali ang bahin sa pundasyon sa tulay, nga nagpatunghag pangutana kabahin sa kahimtang ug kalig-on sa maong imprastraktura human sa aksidente.
Matud ni Carmen PNP Chief PLTCOL Rolly Oranza, gituohang napakyas ang preno sa maong trak maoy hinungdan sa pagkahulog niini. Luwas hinuon ang drayber ug wala maangol sa insidente. Samtang, gipaabot pa ang dugang impormasyon kabahin sa gilapdon sa kadaot sa tulay ug kon unsay sunod nga lakang alang sa pagsusi sa kahimtang niini, lakip na ang posibleng epekto sa paggamit sa maong agianan.
