Gipasabot sa buhatan sa Iligan City Water Works System (ICWS) ngadto sa mga residente dinhi sa dakabayan sa Iligan ang hinungdan dugay pa mo agas ang tubig sa ilang barangay human sa pag ayo sa tubo.
Matud ni Hubert Reyes ang OIC-Head sa ICWS nga ang pag-ayo sa tubo dili pasabot nga mobalik dayon ang tubig sa tanang lugar. Human maayo ang tubo, kinahanglan pa nga mapuno pag-usab ang mga tubo sa tubig ug hinay-hinay nga mobalik ang kusog sa agas.
Hinungdan nga adunay mga lugar nga unang maabtan sa tubig, samtang ang ubang barangay, ilabina ang mas layo o mas taas nga lugar, maghulat pa og dugay.
Dugan ni Reyes nga usahay, hinay usab ang unang agas tungod naghulat pa nga ma-normal ang pagdagan sa tubig sa tibuok linya.
Gidason pa nga kung nahuman na ang pag-ayo apan wala pa dayon moagas ang tubig, dili kini pasabot nga wala pa nahuman ang trabaho. Mahimo nga naghulat pa nga maabot ug mahimong normal ang agas sa inyong lugar.
Nunot niini nanawagan ang ICWS ngadto sa mga residente Kung nibalik na ang tubig pero hinay pa ang agas, hatagi kini og gamay nga panahon.
Apan kung dugay na kaayo nga wala gihapon moagas ang tubig, palihog i-report sa ICWS aron masusi ang inyong lugar.
