Gisugdan na sa Kagamhanang Lokal sa Valencia pinaagi sa City Health Office (CHO) ang pagpatuman sa School-Based Immunization (SBI) o “Bakuna Eskwela” nga molungtad sa tibuok bulan sa Oktubre tuig 2026 sa tanang pampublikong eskwelahan sa dakbayan.
Pinaagi sa suporta ni Mayor Amie Galario ug Vice Mayor Greizl Galario-Fernandez, gipangdeploy sa CHO ang mga nurse ug midwife sa mga barangay aron ipaduol sa mga tunghaan ang libre, luwas, ug epektibong serbisyo sa pagpamakuna.
Nalangkob sa programa ang Measles-Rubella (MR) ug Tetanus-Diphtheria (Td) vaccines alang sa mga estudyante sa Grade 1 ug Grade 7, samtang makadawat usab sa Human Papillomavirus (HPV) vaccine ang mga babayeng learners sa Grade 4 nga nag-edad 9 hangtod 14 anyos.
Panawagan ni Sangguniang Panlungsod Committee Chairman on Health Councilor Jerusha “Sasang” Cadigal-Recla ug sa mga opisyal sa CHO sa mga ginikanan nga suportahan ang inisyatibo, likayan ang fake news, ug mosalig sa kasaligang impormasyon gikan sa DOH ug mga propesyonal sa panglawas
Photo courtesy: Valencia City Health Office
