Nadakpan sa mga otoridad ang giila nga top most wanted person sa tibuok Caraga Region atol sa operasyon sa kapulisan sa lungsod sa Sibagat, Agusan del Sur.
Giila ni Police Brigadier General Rolindo M. Suguilon, Regional Director sa Police Regional Office 13 (PRO 13), ang dinakpan nga si alyas “Nillo,” 49 anyos, ug residente sa maong lugar.
Malampuson nga nadakpan si Nillo sa mga personnel sa Sibagat Municipal Police Station (MPS) pinaagi sa pagpatuman sa warrant of arrest batok kaniya.
Ang suspek giakusahan og siyam ka ihap sa qualified rape batok sa usa ka menor de edad. Sumala sa imbestigasyon sa kapulisan, balik-balik nga nahitabo ang giingong pag-abuso sa biktima sa miaging tuig.
Ang warrant of arrest gi-isyu sa Regional Trial Court (RTC) Branch 7 sa Bayugan City niadtong Nobyembre 20, 2025. Wala usab girekomendar sa korte ang piyansa alang sa temporaryong kagawasan sa suspek.
Ang suspek anaa na sa kustodiya sa kapulisan alang sa hustong proseso sa balaod.
Photo courtesy: PRO 13
