Mokabat sa 1,333 ka mga Tagbinanhon ang nakadawat sa ilang ikaduhang bulan nga payout ubos sa UPLIFT Program niadtong nakalabayng mga adlaw sa Municipal Gymnasium sa Tagbina, Surigao del Sur.
Ang maong payout gipahigayon pinaagi sa pakigtambayayong sa Department of Social Welfare and Development (DSWD) Field Office Caraga ug sa Local Government Unit (LGU) sa Tagbina, ubos sa pagpangulo ni Mayor Galay Polizon-Lanete.
Ang UPLIFT o Uplifting Lives through Cash Assistance usa ka programa nga naghatag og pinansyal nga tabang ngadto sa mga kwalipikadong benepisyaryo aron makatabang sa ilang adlaw-adlaw nga panginahanglanon ug makapalambo sa ilang kahimtang sa kinabuhi.
Gilauman nga ang maong ayuda mahimong dugang nga suporta sa mga benepisyaryo sa pag-atubang sa ilang mga panginahanglanon sa panimalay.
Padayon usab ang LGU Tagbina sa pagpatuman ug pagsuporta sa mga programa nga gitumong sa paghatag og tabang ug dugang nga kahupayan sa mga Tagbinanhon.
Photo courtesy: LGU Tagbina
