Nangandam na ang provincial government sa Surigao del Sur og mga lakang aron maminusan ang posibleng epekto sa El Niño sa agrikultura ug suplay sa tubig sa probinsya.
Atol sa bag-ohay lang nga meeting sa Provincial Disaster Risk Reduction and Management Council (PDRRMC), gikumpirma ni PAGASA Hinatuan Weather Observer Engr. Rumark Leopoldo Bompat nga nakasinati karon og uga nga kondisyon ang Surigao del Sur, base sa meteorological drought monitoring sa PAGASA sa Mindanao.
Matod ni Bompat, ang El Niño mahimong makapahinabo og ubos sa normal nga pag-ulan, nga posibleng mosangpot sa taas nga panahon sa dry spell sa pipila ka lugar.
Tungod niini, naghulat pa ang Provincial Disaster Risk Reduction and Management Office (PDRRMO) sa dugang datos gikan sa Provincial Agriculture Office ug Provincial Environment and Natural Resources Office (PENRO).
Gikinahanglan ang maong impormasyon aron masuta kung unsa kadako ang posibleng epekto sa El Niño, ilabina sa mga mag-uuma, suplay sa tubig ug uban pang sektor nga dali maapektuhan sa kag-uga.
Sumala kang Provincial Administrator John Vincent C. Pimentel, ang tanang datos nga makolekta ug ma-consolidate mahimong basihan sa PDRRMC sa pagplano sa tukmang mga lakang aron mapanalipdan ang agrikultura, water resources ug panginabuhian sa mga Surigaonon.
Gipahinumdoman usab ang publiko nga magmatngon sa paggamit sa tubig ug mangandam alang sa posibleng dugang nga epekto sa El Niño samtang padayon nga gimonitor sa mga otoridad ang kahimtang sa panahon sa probinsya.
Photo courtesy: PDRRMO
