Gipahugtan sa mga security measures ang Panabo City National High School sa Davao del Norte human makadawat og impormasyon kabahin sa usa ka social media post nga adunay posibleng hulga nga may kalabutan sa armas.
Sumala sa administrasyon sa eskwelahan, gisusi nila ang maong impormasyon ug mihimo og mga precautionary measures aron masiguro ang kaluwasan sa mga estudyante, personnel ug tibuok school community.
Nakigkoordinar usab ang eskwelahan sa mga may katungdanang awtoridad ug gipahugtan ang seguridad sulod ug palibot sa campus. Gipasidan-an ang mga security personnel nga magpabiling alerto ug hugot nga bantayan ang mga entrance ug exit points.
Padayon usab nga gimonitor sa school administration ang sitwasyon, samtang ilang gipangayo sa school community ug publiko nga magpabiling kalmado ug likayan ang pag-share o pag-repost sa mga impormasyon nga wala pa na beripika.
Gidasig usab ang tanan nga i-report dayon sa school administration, security personnel o sa tukmang awtoridad ang bisan unsang posibleng hulga o kadudahang kalihukan.
Gipahinumdoman usab ang mga estudyante ug personnel nga makigtambayayong sa mga personahe ilabina panahon sa bag inspection ug pag-monitor sa mga agianan.
Giingon sa maong tunghaan sa Panabo City High Administration nga ang kaluwasan, seguridad ug kaayohan sa mga estudyante ug tibuok school community nagpabiling pinakaunang prayoridad.
Photo Courtesy: Panabo City National High School
