Dakong tabang sa mga K9 Narcotics Detection Dogs ang kampanya batok ilegal nga droga sa Davao del Norte, kini ang gipahayag sa Philippine Drug Enforcement Agency o PDEA Region XI atol sa unang anibersaryo sa K9 NDD Border Interdiction Substations niadtong nakalabay nga adlaw.
Gipadayag ni PDEA Region XI Director Atty. Benjamin Gaspi nga gipirmahan na ni PDEA Director General Undersecretary Isagani Nerez ang sertipiko sa rehistrasyon sa NDD Facility sa nasangpit nga probinsya.
Matud ni Gaspi, dako ang nahatag nga tabang sa maong pasilidad sa ilang operasyon batok ilegal nga droga ug sa pagpalig-on sa seguridad sa katawhan.
Gidayeg usab niya ang pagpangulo ni Governor Edwin Jubahib nga maoy nagpaluyo sa maong inisyatiba. Kahinumdoman nga ang Provincial Government sa DavNor mao ang unang LGU sa nasud nga mipalit mismo og mga K9 dogs aron ikatabang sa kapulisan sa pagsumpo sa kriminalidad.
Napulo ka K9 dogs ang gi-evaluate sa PDEA karong tuiga ug na-deploy na sa nagkalainlaing anti-drug operations sa probinsiya. Gipasabot ni Gaspi nga dili lamang Davao del Norte ang nakabenepisyo sa maong programa, kondili lakip usab ang tibuok Davao Region.
Gisabay sa selebrasyon ang 4th Quarter Meeting sa Provincial Anti-Drug Abuse Council diin gihisgutan ang mga report gikan sa nagkalainlaing task force, komitiba ug law enforcement agencies.
Photo Courtesy: Province of Davao del Norte
