Gidala na sa kauluhan ang 50 ka foriegn nationals ug usa ka pinay nga gikatahong mga rescued victims sa illegal Philippine Offshore Gaming Operator (POGO) nga nag-operate sa lungsod sa Siay ug Alicia, Zamboanga Sibugay.
Ang maong mga foreign nationals gikan sa kustudiya sa Bureau of Immigration (BI) ug National Bureau of Investigation (NBI) ug nahidangat sa Pagadian City Airport, mga alas 12 ang takna sa udto niadtong Martes, Oktubre 6, 2026.
Gisakay sa C130 aircraft ang gikatahong rescued victims paingon sa kauluhan alang sa mas tukma ug legal nga proseso sa kaso.
Nanguna sa pagdala kanila ang mga personahe sa National Bureau of Investigation (NBI) ug Bureau of Immigration (BI) kauban ang mga personahe sa 1st Infantry Tabak Division Philippine Army.
Segun pa, unang batch pa lang kini sa mga narescue nga mga foreign national ug aduna pay musunod nga batch nga mahidangat kon mahuman na usab ang unang proseso aron sila madala na sa kauluhan.
Kahinumduman, anaa sa 244 ka mga langyaw ang nadakpan sa duha ka managlahing operasyon sa Alicia ug sa Siay Zamboanga Sibugay nga gilusad niadtong Oktubre 2, 2026.
