Duha ka motorista ang nasamdan human naatrasan sa usa ka panel truck samtang nagsubida sa Purok Bahada, Barangay Dao, sa Pagadian City, alas 8:40 sa buntag, niadtong nakalabay nga adlaw.
Ang nalambigit sa aksidente mao ang usa ka Isuzu Dropside Truck nga kargado softdrinks gimanehoan sa usa ka 33-anyos nga lalaki, residente sa Iligan City.
Naatrasan niini ang black Yamaha SZ motorcycle nga gimaneho sa 42-anyos nga lalaki, usa ka Non-Uniformed Personnel (NUP) sa Tabina Municipal Police Station, ug ang pulang Honda Beat motorcycle nga gimaneho sa 21-anyos nga estudyante angkas niini ang 43-anyos nga babaye, nagbiyahe padulong sa Barangay Santiago, Pagadian City.
Base sa inisyal nga imbestigasyon, naglatas sa karsada ang panel truck apan wala makasulod ang gear sa primera, hinungdan wala kasaka ug mibakwi paatras. Tungod niini, naatrasan ang duha ka motorsiklo nga nagsunod sa truck.
Matod sa report, nakambak sa iyang motorsiklo ang driver sa Yamaha SZ nakalikay sa aksidente, apan ang duha ka sakay sa Honda Beat maoy nasamdan ug gilayon nga gidala sa hospital alang sa pagpatambal.
Sa pagkakaron, anaa sa kustodiya sa Pagadian City Police Station ang driver sa panel truck ug ang maong sakyanan alang sa dugang nga imbestigasyon.
