Tulo ka mga indibidwal lakip ang duha ka menor de edad ang naangol human sa panagbangga sa duha ka motorsiklo sa National Highway, Purok Quezon, Barangay Balongating, Guipos, Zamboanga del Sur, mga alas 3:18 sa kaadlawon, niadtong Oktubre 7, 2026.
Base sa inisyal nga imbestigasyon, ang itom nga XRM 125 gimaneho sa 17-anyos nga Grade 12 student, sakay ang 14-anyos nga Grade 9 student, ug ang gray nga Honda Click 125 gimaneho sa 20-anyos nga lalaki.
Susama matud pa nga nagpadulong gikan sa Barangay Poblacion paingon sa Barangay Canunan ang duha ka mga motorsiklo ug giingong nabanggaan sa Honda Click ang likod nga bahin sa XRM nga hinay lang unta ang dagan sa maong higayon.
Tungod sa kusog sa impact, natumba ang duha ka motorsiklo ug nasamdan ang duha ka driver ug ang back rider nga gidala usab dayon sa tambalanan sa syudad sa Pagadian alang sa dinalian nga pag-atiman.
Samtang, gidala sa Guipos Municipal Police Station ang duha ka motorsiklo alang sa dugang nga imbestigasyon ug legal nga proseso.
Photo courtesy: ZSPPO-PIO
