Prayoridad sa National Irrigation Administration (NIA) Region 9 ang pag-ayo sa dul-an 3,000 ka ektarya nga mga non-operational nga irrigation projects sa Zamboanga Peninsula.
Matud ni NIA-9 Regional Manager Engr. June Nathaniel S. Plaza, nadaot ang mga irrigation project tungod sa epekto sa nagkadaiyang kalamidad nga miigo sa rehiyon. Gibanabana nga ang maong mga proyekto adunay kapasidad nga makaproduce og kapin 35 milyong kilo sa bugas, nga dakong tabang sa food security sa rehiyon.
Lakip sa pinakadako nga nahuman nga pag-ayo niining tuiga ang Mahayag Dam, nga nagserbisyo sa duolan 8,000 ka ektarya nga umahan sa upat ka mga kasikbit nga munisipalidad.
Gipunting usab sa NIA-9 nga lakip sa ilang prayoridad ang rehabilitation, repair ug maintenance sa mga irrigation facility nga nadaot o dili na makahatag og hapsay nga suplay sa tubig ngadto sa mga umahan.
