Gipahigayon niadtong Oktubre 6, 2026, ang Memorandum of Agreement kun MOA signing tali sa Juander Radyo Mati ug Bureau of Jail Management and Penology Lupon District Jail, didto sa Valles Building, 2nd Floor, Brgy. Dahican, Mati City, Davao Oriental. Ang maong kalihokan gipangunahan ni JCINSP JAYRONE P MABBORANG, District Jail Warden, kauban sila JO2 Sheryl B Estaca, CRS JNOR ug si JO1 Dan T Gonzales, CRS JNOR.
Tumong sa maong pagpinirmahay ang pagpalig-on sa relasyon ug koordinasyon tali sa duha ka buhatan, ilabina sa pagpaabot sa mga importanteng impormasyon ngadto sa katawhan pinaagi sa radio guesting nga ipahigayon matag bulan.
Pinaagi niini, mas mapalapad ang paghatag og kahibalo sa publiko kabahin sa mga programa, serbisyo, kalihokan ug mga inisyatiba sa BJMP Lupon, lakip na ang mga impormasyon nga may kalabotan sa pagdumala ug pag-atiman sa mga Persons Deprived of Liberty kun PDL. Nasayran nga dugay na kining giplano aron mapalambo pa ang pakigtambayayong tali sa duha ka organisasyon ug mahimong mas lig-on nga agianan sa pagpaabot sa husto ug mapuslanong impormasyon ngadto sa komunidad.
Samtang, kini nga lakang nagpakita sa importansya sa pagtinabangay tali sa mga ahensya sa gobyerno ug sa media aron mas mapaduol sa katawhan ang mga programa ug serbisyo ingon man aron masiguro nga ang publiko makadawat og tukma, klaro ug regular nga impormasyon.
