Nasikop sa Police Regional Office 11 o PRO XI ang 13 ka mga indibidwal ug nasakmit ang kapin P4.1 milyon nga kantidad sa ilegal nga droga atol sa 24-oras nga operasyon gikan Oktubre 3 hangtod Oktubre 4, 2026.
Matod ni Acting Regional Police Director PBGEN Benigno L. Guzman, narekober sa 11 ka anti-drug operations ang 553.35 gramos nga shabu, 1,024.91 gramos nga marijuana leaves ug 225 gramos nga marijuana kush.
Gawas sa kampanya batok droga, siyam ka wanted person ang nadakpan, lakip ang duha ka top ten most wanted. Usa usab ang nasikop sa loose firearms operation, samtang walo ka armas ang boluntaryong gitugyan sa mga tag-iya niini.
Nakarekord usab ang PRO XI og mga operasyon batok illegal gambling, illegal fishing, illegal logging ug smuggling, diin nasakmit ang nagkalain-laing ebidensya ug mga kontrabando. Matod ni Guzman, padayon nilang palig-onon ang mga operasyon aron mapadayon ang kalinaw ug kahapsay sa tibuok Davao Region.
Photo courtesy: PRO 11
