Gitutokan sa usa ka panagtigom sa People’s Administration ang mga estratehiya ug pagpangandam batok sa posibleng epekto sa Super El Niño nga gilauman nga mabati sa nasud sugod karong panahona hangtod sa sunod tuig. Gipasiugda sa mga opisyal ang kahinungdanon sa sayong pagpangandam aron malikayan o mapakunhod ang posibleng epekto niini sa komunidad.
Gipangulohan ni Mayor Mayo Almario ang maong panagtigom uban si CDRRMO Head Charlemagne Bagasol, Barangay Central Captain Danny Macaubos, ug mga opisyal sa City Disaster Risk Reduction and Management Council (CDRRMC).
Gihisgutan ang mga lakang aron mas mapalig-on ang koordinasyon ug pagtubag sa posibleng mga emerhensya nga mahimong dala sa grabeng kainit ug kakulang sa ulan.
Tumong sa maong paningkamot nga masiguro ang direktang koordinasyon tali sa city government ug mga barangay, ilabina sa panahon sa krisis o emerhensya. Pinaagi sa hiniusang pagpangandam, gilauman nga mas andam ang mga komunidad sa Mati sa pag-atubang sa mga posibleng epekto sa Super El Niño.
Photo courtesy: LGU Mati
