Patay nang nakaplagan ang usa ka 16-anyos nga estudyante sa Del Pilar National High School human kini makit-ang nagbitay sa usa ka punoan sa mangga duol sa ilang pinuy-anan sa Purok 1, Barangay Del Pilar, Manay, Davao Oriental, niadtong nakalabay nga adlaw.
Sumala sa report sa Manay Municipal Police Station, nadawat sa kapulisan ang impormasyon pasado alas 8:30 sa buntag kalabot sa maong insidente. Diha-diha misanong sa lugar ang mga personahe sa kapulisan alang sa pag-verify ug inisyal nga imbestigasyon, diin ilang nakita ang biktima sa maong kahimtang ug adunay nakita nga marka sa liog.
Gisiguro ug gipreserba sa mga responding personnel ang lugar samtang gihimo ang inisyal nga dokumentasyon ug pagpangutana sa mga saksi. Base sa unang imbestigasyon, wala’y nakita nga timailhan sa foul play, apan padayon gihapon ang imbestigasyon aron hingpit nga matino ang mga sirkumstansya nga mitultol sa insidente.
Gidala ang biktima sa Manay Hospital pinaagi sa MDRRMO, apan gideklarang dead on arrival sa duty physician nga si Dr. John Chester Tumandong, MD, alas 10:45 sa buntag. Ang mga may kalabutan nga awtoridad nakigtambayayong usab sa pagproseso sa medico-legal ug uban pang dokumentasyon alang sa dugang nga imbestigasyon.
Photo courtesy: Manay MPS
