Patay ang usa ka manager sa Strong Group Mining Corporation (SGMC) human gipusil, niadtong nakalabay nga adlaw sa National Highway sa Barangay Bacolod, Carrascal, Surigao del Sur. Giila ang biktima nga si Philip M. Engbino, 48 anyos, minyo, ug manager sa EZMMI GenCon sa SGMC.
Gikumpirma sa Carrascal Municipal Police Station, nga nakita sa mga meresponde nga pulis ang puti nga Dongfeng pickup nga gipanag-iya sa SGMC, nga adunay plate number NKK 1748 diin adunay nakita nga mga igo sa bala sa bahin sa windshield sa driver’s side.
Base sa inisyal nga impormasyon sa kapulisan, nakadawat una og mga reklamo ang biktima gikan sa pipila ka empleyado sa kompanya, ilabina may kalabotan sa pag-undang o pagtangtang sa pipila ka benepisyo sa mga trabahante.
Sa record sa kompanya, migawas ang maong sakyanan sa Gate 2 sa SGMC alas 4:35 sa hapon niadtong Oktubre 3, ug gimaneho mismo sa biktima. Padayon karon ang imbestigasyon sa kapulisan aron maila ang responsable sa pagpamusil ug matino ang tinuod nga motibo sa krimen.
