Nadakpan sa kapulisan ang usa ka lalaki nga giilang si alyas nga “Jun,” 42-anyos, minyo, construction worker ug residente sa Sitio Luy-a, Barangay Bachao, Leyte, Leyte atol sa gilusad nga hot pursuit operation human sa insidente sa pagpamusil nga misangpot sa pagkamatay sa usa ka tawo sa didto sa susamang lugar niadtong nakalabay nga adlaw.
Sumala sa inisyal nga imbestigasyon sa Leyte Municipal Police Station, nag-inom ang biktima, suspek, asawa sa suspek nga giila sa alyas nga “Mary” ug ubang silingan sa gawas sa ilang pinuy-anan sa wala pa ang insident diin atol sa panag-inom, giingong gipatawag sa suspek ang iyang asawa ug gisultihan nga mosulod sa balay tungod sa usa ka butang nga iyang giingong nabuhat.
Misunod ang panaglalis sulod sa balay, diin daw misulay ang biktima sa pagbadlong ug pagpakalma sa sitwasyon. Apan, giingong nakit-an niya ang suspek nga nagkupot og hinimo nga armas ug gipusil siya sa tuo nga bahin sa tiyan.
Human sa pagpamusil, mikalagiw ang suspek padulong sa kabukiran sa Barangay Bachao ug milusad dayon ang mga kapulisan ug pagpangita kaniya nga misangpot sa pagkadakop sa suspek. Samtang, ang biktima naman gidala sa Biliran Rural Health Unit ug gibalhin ngadto sa Biliran Provincial Hospital, diin gideklarar siyang patay na sa attending physician.
Giimbestigahan na usab sa Biliran Provincial Forensic Unit SOCO Team ang lugar sa nahitaboan sa insidente ug narekober ang usa ka improvise shotgun nga giingong gigamit sa pagpamusil. Sa pagkakaron anaa sa kostudiya sa kapulisan ang naasoy suspek lakip usab ang armas alang sa tukmang dokumentasyon ug disposasyon.
