Gipahigayon sa National Nutrition Council (NNC) Region X kauban ang BNS Federation Northern Mindanao Chapter ang 9th Regional BNS Conference niadtong nakalabay nga adlaw, sa Kaamulan Folk Arts Theater, Malaybalay City, Bukidnon.
Ubos sa temang “Serbisyo, Pagkaisa at Dedikasyon: Empowering the Modern Barangay Nutrition Scholars,” gitumong sa maong tigum ang pagpauswag sa kapabilidad sa kapin 2,000 ka mga Barangay Nutrition Scholars (BNS), Nutrition Action Officers, ug mga opisyal sa lokal nga komite sa nutrisyon pinaagi sa mga teknikal nga sesyon bahin sa pag-amenda sa PD 1569 ug RA 11148 (Kalusugan at Nutrisyon ng Mag-nanay Act), multisectoral convergence mechanisms, ug Digital Citizenship.
Gipadayag usab ni Malaybalay City Mayor Atty. Jay Warren Pabillaran ang iyang bug-os nga suporta ug pag-ila sa dakong papel sa mga BNS isip mga frontliner sa pagpatuman sa Philippine Plan of Action for Nutrition (PPAN) 2023-2028.
Gawas sa mga lecture ug open forum, gipahigayon sab ang General Assembly sa pederasyon sa panguna nila Ms. Metchel P. Malapad ug Ms. Dorothy Felipe alang sa konstitusyon ug financial report, ingonman ang paghatag og Service Awards sa mga dugay nang nag-alagad samtang adunay usa ka raffle draw nga naghatag og dugang kalipay sa mga partisipante
Photo courtesy: Malaybalay City Nutrition Office
