Nabawi sa mga kapulisan sa Butuan City ang usa ka gituohang kinawat nga Toyota Alphard atol sa tactical checkpoint sa National Highway, Purok 10, Barangay Los Angeles, Butuan City niadtong Oktubre 5, 2026. Nadakpan usab ang drayber sa maong sakyanan nga giila sa alyas nga “Mac.” Ang operasyon gikasa pinaagi sa koordinasyon sa BCPS6, BCMFC-SWAT ug RHPU-13.
Dugang pa nasuta sa kapulisan nga gipulihan ang orihinal nga plate number sa sakyanan, samtang wala usab magkatakdo ang mga dokumentong gidala sa sakyanan sa gigamit nga plaka.
Base sa verification, ang sakyanan legal nga gipanag-iya sa usa ka negosyante nga residente sa Marilao, Bulacan, ug gi-report nga nakawat human kini gi-rentahan gikan sa Car Rental sa NAIA Terminal 2 niadtong Oktubre 1.
Narekober usab nga gitangtang sa walay pagtugot ang duha ka built-in GPS tracking devices sa sakyanan. Samtang, miabot na sa Butuan City ang tinuod nga tag-iya gikan sa Bulacan ug nabawi na ang iyang sakyanan.
Photo courtesy: BCPO
