Kapin P1.7 milyon pesos nga kantidad sa shabu ang nasakmit sa Police Regional Office 13 o PRO13, samtang 48 ka mga suspek sa illegal nga droga ang nadakpan atol sa Simultaneous Anti-Criminality Law Enforcement Operations o SACLEO sa tibuok Caraga Region.
Gipahigayon ang operasyon gikan Setyembre 28 hangtod Oktubre 5, 2026, diin mikabat sa 257.3136 gramos nga shabu ang kinatibuk-ang nasakmit sa kapolisan, nga nagkantidad sa P1,749,732.48.
Pinakadaghan sa nakumpiskang shabu ang natala sa Surigao del Norte Police Provincial Office, nga nakasakmit og 121.9526 gramos nga nagkantidad og P829,277.68. Gisundan kini sa Surigao del Sur PPO nga nakumpiska og 57.3 gramos; Butuan City Police Office nga 44.873 gramos; Agusan del Norte PPO nga 22.938 gramos; Agusan del Sur PPO nga 9.75 gramos; ug Dinagat Islands PPO nga 0.5 gramos.
Sumala kang PBGen Rolindo M. Suguilon, Director sa PRO13, gipahugtan ang maong kampanya sa padayong pagpaningkamot sa PNP Caraga sa pagpanalipod sa komunidad batok sa epekto sa illegal nga droga.
