Gipahigayon sa Local Government Unit sa Ormoc City, pinaagi sa Ormoc City Tourism Office (OCTO), sa pakigtambayayong sa Department of Tourism (DOT), ang unang adlaw sa duha ka adlaw nga Filipino Brand of Service Excellence (FBSE) Training nga gipahigayon ang maong pagbansay didto sa Liga ng mga Barangay Function Hall, Good Governance Building, kagahapong adlawa.
Pinaagi sa maong training, gihatagan ang mga partisipante og dugang nga kahibalo ug praktikal nga mga pamaagi sa paghatag og mainiton, episyente ug tinud-anay nga Filipino nga pagkamaabiabihon sa mga bisita.
Lakip sa mga hilisgutan nga gihisgutan ang Philippine Tourism Industry Situationer, FBSE Journey, ug ang 7Ms of Filipino Hospitality Service Excellence in Tourism.
Gipangunahan ang mga diskusyon ni Cyril Jose Ignacio, usa ka DOT-accredited FBSE Resource Speaker, nga mipakigbahin sa mga kahibalo ug praktikal nga pamaagi nga magamit sa mga partisipante sa ilang tagsa-tagsa ka katungdanan.
Gilauman nga ang maong pagbansay makatampo sa dugang pagpauswag sa serbisyo sa tourism sector sa Ormoc City ug sa pagpalig-on sa reputasyon sa siyudad isip usa ka destinasyon nga naghatag og kalidad ug Filipino nga pagkamaabiabihon sa mga bisita.
Photo courtesy: City government of Ormoc
