Nasikop sa kapulisan atol sa gikasang anti-illegal drug operation ang duha ka lalaki alas-2:30 sa hapon niadtong nakalabay nga adlaw, sa Barangay Visayan Village, Tagum City. Gipangulohan ang operasyon sa Tagum City Police Station (TCPS), uban ang Davao Norte Provincial Intelligence Unit (DNPIU) ug 1st Davao Norte Provincial Mobile Force Company (1st DNPMFC).
Giila ang mga nadakpan sa alyas “Mon,” 54 anyos, residente sa Barangay Visayan Village, ug alyas “Cristopher,” 50 anyos, residente sa Barangay Apokon, sa nasangpit nga syudad. Subay sa report, nakapalit ang poseur-buyer og usa ka heat-sealed transparent sachet nga gituohang adunay shabu, gamit ang ₱500 nga tinuod nga kwarta ug pito ka machine-copied nga ₱1,000 nga mga bill.
Gawas sa nakuha atol sa buy-bust, nakumpiska usab sa mga operatiba ang usa ka dako nga heat-sealed sachet ug upat ka gagmay nga heat-sealed sachet nga adunay gituohang shabu.
Narekober usab ang mga gamit nga gituohang may kalabotan sa illegal drug activity, lakip ang disposable lighters, pouch, improvised glass tooters, digital weighing scale, improvised bamboo clips, gunting, ug usa ka pack sa transparent plastic cellophane.
Sa kinatibuk-an, gibana-banang 50 gramos ang gibug-aton sa gituohang shabu, nga adunay Standard Drug Price nga mokabat sa ₱340,000. Ning kasamtangan, anaa na ang duha ka suspek sa kustodiya sa Tagum City Police Station samtang giandam na ang kasong paglapas sa Sections 5, 11, ug 12, Article II sa Republic Act No. 9165 o Comprehensive Dangerous Drugs Act of 2002.
Photo Courtesy: PNP Tagum City Police Station
