Gipasidunggan pinaagi sa military arrival honors sa 10th Infantry “Agila” Division sa Philippine Army si Brigadier General Adolfo Espuelas Jr., PA, Commander sa Headquarters and Headquarters Support Group, Philippine Army, atol sa iyang exit visit sa Camp General Manuel T. Yan Sr., Mawab, Davao de Oro niadtong Oktubre 4, 2026. Ang maong pagbisita gihimo pipila ka adlaw sa wala pa ang iyang pagretiro sa serbisyo militar karong Oktubre 8.
Atol sa iyang pagbisita, nakigkita si Brig. Gen. Espuelas kang Major General Alvin Luzon, Commander sa 10ID, PA, isip kabahin sa iyang pre-retirement exit visits sulod sa Eastern Mindanao Command Joint Operations Area.
Nasayran nga si Espuelas kaniadto nahimong Assistant Chief of Staff for Intelligence, G2, 10ID, Commanding Officer sa 10th Military Intelligence Battalion, ug Commanding Officer sa 73rd Infantry Battalion, nga nagpakita sa iyang dugay nang relasyon ug kontribusyon sa Agila Division.
Gipasalamatan ni Maj. Gen. Luzon ang matinud-anong serbisyo ug mga kontribusyon ni Brig. Gen. Espuelas sa Philippine Army. Samtang sa iyang bahin, mipasalamat si Espuelas sa mainitong pagdawat sa Agila Troopers ug sa higayon nga makabalik ug makigkita pag-usab sa mga miyembro sa Division. Si Brig. Gen. Espuelas usa ka miyembro sa Philippine Military Academy “Class of 1993” ug motapos na sa iyang dekadang serbisyo alang sa katawhang Pilipino.
Photo Courtesy: 10th Infantry “Agila” Division, Philippine Army
