Malampusong nasikop sa joint police operation ang usa ka indibidwal nga gikonsiderang Top 1 Regional Most Wanted Person (Provincial Level) atol sa pagpatuman sa Warrant of Arrest niadtong Oktubre 1, 2026, bandang alas-10:00 sa buntag, sa Barangay Bayugan 3, Rosario, Agusan del Norte. Gipangulohan ang operasyon sa PNP Tagum Tracker Team sa Tagum City Police Station, uban ang 2nd ADS PMFC Tracker Team ug RIU-13 PIT.
Giila ang nadakpan sa alyas “Jessel June,” 41 anyos, lalaki, ug residente sa Tagum City. Giisyu ang maong warrant of arrest sa Acting Presiding Judge sa Regional Trial Court, Eleventh Judicial Region, Branch 1, Tagum City, may kalabotan sa kasong Murder ubos sa Article 248 sa Revised Penal Code. Wala’y girekomendang piyansa ang korte kalabot sa maong kaso (not bailable).
Human sa operasyon, ang dinakpan gidala ug anaa na karon sa kustodiya sa Tagum City Police Station alang sa tukmang disposisyon.
Giawhag sa kapulisan ang tanang mga residente sa Tagum nga magpadayon sa pagpakabana ug pagreport sa bisan unsang kadudahang kalihokan, krimen, o illegal nga aktibidad sa matag lugar. Alang sa mga impormasyon o emerhensiya, mahimong motawag sa gilayon sa 911 o mokontak sa police hotline.
Photo Courtesy: PNP Tagum City Police Station
