Tulo ka lalaki nga giila lamang sa ilang mga alyas nga “Biwan,” 30 anyos; “Bito,” 23 anyos; ug “Bitre,” 23 anyos, nga parehong mga residente sa Deca Homes, Barangay Concepcion, Ormoc City ang nadakpan sa mga sakop sa Ormoc City Police Station 1 (OCPS1) human giingong migamit og peke o AI-generated nga resibo sa GCash aron makakuha og cash-out nga mokabat og P4,000 sa usa ka tindahan sa Barangay Can-adieng, sakop sa Ormoc City, alas-6:00 ang takna sa buntag niadtong Oktubre 5, 2026.
Ang insidente gikataho sa kapulisan alas-8:30 sa buntag sa maong adlaw ug giimbestigahan isip posibleng paglapas sa Article 315 o Estafa ubos sa Revised Penal Code.
Base sa inisyal nga imbestigasyon, giingong nagkonsabo ang tulo ka indibidwal ug mipakita sa cashier og AI-generated nga GCash receipt isip pamatuod matod pa sa pagbayad aron makakuha og P4,000 nga cash-out. Apan namatikdan sa cashier nga wala diay aktwal nga na-credit ang maong kantidad sa account.
Giingong gipadali sa mga suspek ang transaksyon ug naghimo og kahimtang nga daw dinalian aron dili na masusi pag-ayo sa cashier ang bayranan. Human mabantayan ang iregularidad, gipahibalo dayon sa cashier ang iyang supervisor ug nangayo og tabang sa security guard, nga mitabang sa pagpugong sa tulo ka suspek hangtod sa pag-abot sa mga otoridad. Gidala sila sa OCPS1 alang sa hustong dokumentasyon ug disposisyon, samtang giandam na sa kapulisan ang mga dokumento alang sa posibleng pagsaka og kaso sa Estafa, nga magpaabot pa sa dugang imbestigasyon ug pagrepaso sa mga may katungdanan sa pagpasaka sa kaso.
Gipahibalo usab sa mga nadakpan ang hinungdan sa ilang pagdakop ug ang ilang mga katungod ubos sa konstitusyon, gamit ang pinulongan nga ilang nasabtan.
Gipahimangnoan usab ang publiko, ilabina ang mga establisyemento ug mga empleyadong nagdumala og kuwarta, nga dili magsalig lamang sa screenshot o digital receipt isip pamatuod sa bayad, kinahanglan direktang susihon sa opisyal nga payment platform o account history kung tinuod nga nadawat ug na-credit ang bayad sa dili pa magpagawas og kuwarta o produkto.
Photo courtesy: PNP Ormoc City PS1
