Gipalig-on sa Agricultural Training Institute o ATI Davao Region ang kahibalo ug abilidad sa mga mag-uuma sa lubi aron makahimo og mas limpyo, luwas ug mas madawat sa merkado nga copra. Napahigayon ang Training on Good Quality Copra Production and Processing, Batch 6 sa Comval Hotel sa Nabunturan, Davao de Oro ning bag-ohay lang.
Ang nasangpit nga kalihukan gitambungan sa 32 ka coconut farmers, lakip na ang mga miyembro sa Ngan Small Coconut Farmers Organization, Lebanon Small Coconut Farmers Association ug Baylo Coconut Farmers Cooperative ang nakabenepisyo sa maong pagbansay.
Pinaagi sa training, gipausbaw ang kahibalo ug praktikal nga kahanas sa mga mag-uuma sa hustong post-harvest handling ug processing sa lubi, ilabina kay dako ang epekto sa pamaagi sa pag-ani, pagproseso ug pagtipig sa kalidad sa copra.
Tumong sa ATI nga matabangan ang mga mag-uuma nga makahimo og mas kalidad ug mas marketable nga copra, nga makatampo usab sa pagpalambo sa ilang panginabuhian.
