Dead on Arrival (DOA) sa Quezon Health Center Infirmary ang usa ka 31-anyos nga lalaking pedestrian human nabanggaan sa wala mailhing sakyanan sa National Road sa Purok 5, Tugas, Barangay Kiburiao, Quezon, Bukidnon, niadtong nakalabay nga adlaw.
Giingong ang biktima, nga residente sa Purok 14 sa samang barangay, misuway paglabang sa dalan bandang alas-4:55 sa buntag sa dihang gibanggaan kini sa sakyanan nga gikan sa direksyon sa Davao City ug paspas nga misibat padulong sa wala masayrang dapit.
Sumala sa inisyal nga imbestigasyon sa Quezon Municipal Police Station (MPS) ug sa Duty Traffic Investigator, gawas nga walay nakit-ang CCTV camera sa lugar, ngitngit usab ang maong bahin sa dalan tungod sa kakulang sa mga suga sa kalsada.
Tungod sa kakusog sa pagkabangga, natumba ug nagligid ang biktima sa kilid sa kalsada kinsa nakahiagom ug grabeng samad sa kalawasan. Gipadayag usab sa attending physician sa ospital nga ang biktima ubos usab sa ilimnong makahubog sa dihang nahitabo ang aksidente,
Sa karon padayon ang kapolisan sa pagpangita sa misibat nga driver ug sakyanan.
Photo courtesy: Quezon Municipal Police Station
