Gipahimangnoan sa 1st Davao Norte Provincial Mobile Force Company (1st DNPMFC) ang publiko nga magpabiling alerto ug mohimo og tukmang mga lakang aron malikayan ang pagpangawat ug uban pang krimen, taliwala sa ber months alang sa nagsingabot nga holidays.
Pinaagi sa ilang Anti-Theft Awareness Campaign, gidasig sa kapulisan ang mga residente nga mahimong magbinantayon sa ilang mga palibot ug siguruhong luwas ang ilang mga kabtangan. Lakip sa mga pahimangno sa kapulisan mao ang pag-lock kanunay sa mga sakyanan, likayan ang pagbilin og mga bililhon nga butang sulod sa awto, ug pagsiguro nga hapsay ug lig-on ang seguridad sa balay, opisina ug mga establisemento.
Gidasig usab ang mga motorista nga mogamit og dugang nga anti-theft devices sama sa steering lock, disc lock ug alarm aron mapalig-on ang seguridad sa ilang mga sakyanan. Gipasiugda sa 1st DNPMFC ang kahinungdanon sa maayong suga sa palibot, ilabina panahon sa gabii, ug ang pagtipig sa mga serial number ug pruweba sa pagpanag-iya sa mga importanteng butang.
Dugang pa, gihangyo ang publiko nga motaho dayon sa mga suspetsadong tawo o kalihokan ngadto sa labing duol nga estasyon sa kapulisan. Sumala sa kampanya, “Crime prevention starts with you”—usa ka pahinumdom nga ang pagpugong sa krimen responsibilidad dili lamang sa kapulisan kundili apil usab sa matag miyembro sa komunidad.
Photo Courtesy: KMPS
