Samdan ang usa ka drayber sa motorsiklo human kini nalambigit sa karambola sa kalsada sa intersection sa Guijo St. ug Talisay St., Purok Maluwalhati, Barangay Poblacion, Tampakan, South Cotabato, bandang alas-11:30 sa buntag niadtong nakalabay nga adlaw.
Ang biktima giila sa alyas James, 27 anyos, drayber sa motorsiklo, samtang ang alyas Victor, 60 anyos, maoy nagmaneho sa Ford Everest nga sakyanan. Pareho silang residente sa maong lugar.
Subay sa imbestigasyon sa kapulisan, pareho nang gibaybay sa duha ka sakyanan ang kalsada sa Purok Maluwalhati, Barangay Poblacion, Tampakan Highway, dihang pag-abot sa maong lugar aksidenteng nabanggaan sa Ford Everest ang Raider nga motorsiklo.
Nalagpot ang drayber sa motorsiklo ug nasamdan tungod sa kakusog sa dagan sa SUV. Human niini, nabalintong man usab ang Ford Everest ug mibangga sa nakaparadang Skygo nga motorsiklo, ug dayon midiretso sa usa ka tindahan.
Gidala dayon sa ospital ang batan-ong lalaki nga drayber sa motorsiklo alang sa pagtambal. Samtang ang drayber sa Ford Everest wala usab maunsa ug anaa sa luwas nga kahimtang.
Sa pagkakaron, nagpadayon ang kapulisan sa ilang lawom nga imbestigasyon, samtang ang mga sakyanan anaa na sa kustodiya sa Tampakan MPS alang sa tukmang disposisyon.
