Misaka ang singil sa kuryente sa South Cotabato II Electric Cooperative o SOCOTECO II niadtong Septiyembre, tungod sa pagsaka sa generation charge nga resulta sa pagkunhod sa suplay sa kuryente ug pagmahal sa presyo sa power market.
Lakip sa mga hinungdan ang pagkunhod sa produksiyon sa Agus-Pulangi Hydropower Plants, pagkunhod sa alokasyon sa barato nga kuryente gikan sa PSALM tungod sa preventive maintenance, ug maintenance usab sa pipila ka coal-fired power plants.
Tungod sa kakulang sa suplay ug pagdaghan sa power plant outages, mas napadaghan ang pagkuha og kuryente sa Wholesale Electricity Spot Market o WESM diin mas taas ang presyo.
Gikan sa P9.50 kada kilowatt-hour niadtong Agosto, misaka sa P12.50 kada kilowatt-hour ang power rate sa SOCOTECO II karong Septiyembre.
Katumbas kini og P2.90 nga dugang sa matag kilowatt-hour. Giingon usab sa kooperatiba nga ang init nga panahon nakadugang sa konsumo sa mga panimalay tungod sa mas dugay nga paggamit sa electric fan, air conditioner ug uban pang electrical appliances.
Sa breakdown sa bayranan, kapin sa 7 pesos kada kilowatt-hour ang napunta sa power suppliers, samtang adunay bahin alang sa system loss ug ubang charges, buhis sa gobyerno, transmission charge sa NGCP, ug bahin sa SOCOTECO II.
Gipatin-aw sa kooperatiba nga dili direktang kontrolado niini ang presyo sa power supply ug ubang pass-through charges nga ilang kolektahon ug i-remit sa mga power supplier, NGCP ug gobyerno.
