Nadakpan sa hiniusang manhunt operation sa Barangay San Isidro, Malalag, Davao del Sur ang giila nga Top 4 Most Wanted Person sa provincial level, pasado alas-9:05 sa gabii niadtong Oktubre 5, 2026.
Gipatuman sa Provincial Tracker Team sa Davao del Sur Police Provincial Office, kauban ang Police Intelligence Unit ug Malalag Municipal Police Station, ang warrant of arrest batok sa suspek tungod sa kasong rape.
Ang warrant giisyu ni Judge Carmelita Sarno Davin sa Regional Trial Court sa Digos City, diin walay piyansang girekomendar alang sa temporaryong kagawasan niini.
Gipahibalo sa kapulisan ang dinakpan sa iyang mga katungod konstitusyonal, ug kasamtangang anaa sa kustodiya sa Malalag Municipal Police Station alang sa hustong dokumentasyon ug disposisyon sa kaso.
