Gipresentar sa Ipil Municipal Health Office o MHO ang AMOMA STI and HIV Program atol sa on-site validation alang sa Layag Awards for Excellence in Local Governance sa DILG Region IX.
Gipahigayon ang validation sa Ipil Rural Health Unit, diin gipakita sa MHO ang mga serbisyo sa AMOMA ug ang community-based approach niini sa paghatod sa serbisyo panglawas ngadto sa mga residente.
Lakip sa gipresentar ang Sundown Clinic, pakigtambayayong sa mga peer educators, ug ang integration sa STI ug HIV services uban sa Tuberculosis, Maternal Health ug Adolescent Health programs.
Pinaagi niini nga pamaagi, gitumong sa programa nga mas mapaduol ang health services sa komunidad, ilabina alang sa mga nanginahanglan og accessible, responsive ug pribadong serbisyo.
Bisan pa sa pag-apil sa Layag Awards, gipasiugda sa Ipil MHO nga labaw sa recognition ang tinuod nga tumong sa programa — ang paghatag og impormasyon, testing, treatment ug suporta sa mga tawo nga nanginahanglan niini. Padayon usab ang opisina sa pagpalig-on sa mas accessible, inclusive ug responsive nga healthcare services sa Ipil.
