Gipahibalo sa Local Civil Registrar Office o LCRO sa LGU Ipil nga available na ang Batch Request Entry Query System o BREQS alang sa mga residente nga nanginahanglan og civil registry documents gikan sa Philippine Statistics Authority o PSA.
Ang BREQS usa ka serbisyo nga nagtugot sa pagproseso sa daghang requests alang sa birth certificate, death certificate, marriage certificate ug CENOMAR pinaagi sa authorized partner agencies. Gilauman nga makatabang kini sa pagdumala sa daghang document requests ug makapahapsay sa proseso alang sa mga kliyente.
Para makapag-request, gikinahanglan ang valid government-issued ID ug fully accomplished PSA form sa matag aplikante. Kung representative ang mo-request, kinahanglan usab ang duly signed authorization letter ug valid ID sa document owner ug sa representative.
Ang bayad alang sa Certificate of Live Birth, Certificate of Death ug Certificate of Marriage kay 255 pesos matag usa, samtang 310 pesos ang CENOMAR. Hatagan usab ang kliyente og official receipt ug claim stub nga adunay impormasyon sa gipaabot nga release sa dokumento.
