Daling gidala sa Ospital ang usa ka lalaki human kini giluba sa iyang igsuon human sa ilang init nga lalis sa Zone 6, Block 5, Barangay Fatima, General Santos. Nahitabo ang insidente niadtong nakalabay nga adlaw.
Ang biktima naila nga si alyas Dondon, 47 anyos, ulitawo ug electrician. Samtang ang suspek giila nga si alyas Enting, 51 anyos, ug parehong residente sa nasampit nga barangay.
Migula sa imbestigasyon sa kapulisan nga mipauli sa ilang balay nga nakainom ang suspek, dihang natigayon ang panaglalis sa duha.
Hangtod nga gikuha sa biktima ang usa ka stand sa electric fan ug gibunalan ang suspek, rason nga midagan kini ug mikuha og kutsilyo, dayon dunggab sa iyang manghod.
Naigo sa tuo nga kamot ug tiil ang biktima, hinungdan nga gidala kini sa ospital sa mga personahe sa Fatima PNP. Boluntaryo usab nga mitahan ang suspek sa buhatan sa kapulisan ug anaa na karon sa kustodiya sa mga otoridad.
Sa pagkakaron, gipangandam na sa kapulisan ang kasong attempted homicide batok sa maong suspek.
